Музей

Кажуць, што беларусы – гэта людзі з валошкавымі вачыма і льнянымі валасамі. І гэта нездарма. Бо лён – спрадвечны спадарожнік беларусаў,  ён спакон вякоў дапамагае, падтрымлівае і ахоўвае наш народ, нібы анёлак.

За гэта яго шанавалі і пеставалі ў полі з вясны да восені. Прадучы і вышываючы, жанчыны давяралі яму свае сакрэты і не хавалі слёз, а мужчынаў лён ахоўваў у гарачыню і сцюжу, на працы і паляванні. Лён суправаджаў чалавека цягам усяго жыцця. Навароджанага заварочвалі ў пялюшкі- “мятлікі”, зробленыя з падала матчынай льняной кашулі, жаніх і нявеста абавязкова мусілі пастаяць на льняным ручніку, каб перайсці ў новае, сямейнае жыццё.

Пазнаёміцца з “беларускім золатам”, дакрануцца да гісторыі лёну мы запрашаем Вас у наш этнаграфічны музей.

Музей “Дарога лёну” заснаваны ў лістападзе 2006 года. Але яшчэ з 1984 года ў школе працуюць ткацкія станкі, накоплены вялікі вопыт, багаты матэрыял па ткацтву. З гонарам можна сказаць, што ў 1985 годзе школа ўдзельнічала ў Выставе дасягненняў народнай гаспадаркі ў горадзе Маскве. Работы былі адзначаны дыпломам першай ступені. Ткацкі станок, які ўдзельнічаў у выставе, захоўваецца ў музеі.

Экспазіцыя "Апрацоўка лёну" расказвае аб пааперацыйнай апрацоўцы лёну нашымі прабабулямі: ад сяўбы да атрымання нітак.

Вырошчванне лёну:
	насенне лёну
	цвіце лён
	сарваны лён
	абабіты лён
	сцелены лён
	лён у конусе
	сноп лёну
Прылады для апрацоўкі лёну:
	мялка
	трапло
	грэбень
Прылады для вырабу нітак:
	прасніца з калаўротам
	вітушкі
	матавіла

Экспазіцыя "Вырабы з лёну" знаёміць з цудоўнымі тканымі вырабамі з лёну 30-х – 80-х гадоў мінулага стагоддзя. Гэта абрусы, ручнікі, дываны, якія сімвалізуюць гасціннасць, ветлівасць, хлебасольнасць беларускага народа і ў наш час.

	палатно
	ручнікі
	абрусы
	дываны

Ткацтва – найбольш развітая галіна народнай творчасці ў Беларусі і ў нашай мясцовасці таксама. Даўней ткалі ў кожнай вёсцы, у кожнай хаце. Гэта нялёгкая жаночая праца лічылася абавязковай для гаспадыні. Гаспадыня найперш ткала палатно для адзення, потым неабходныя ў хаце посцілкі, ручнікі і ў апошнюю чаргу з адходаў нітак – ходнікі, мяхі.

Экспазіцыя ўключае:

	два рабочыя ткацкія станкі (кросны)
	ткацкі станок-удзельнік ВДНГ у Маскве ў 1985 годзе
	прылады для снавання асновы
	прылады для вырабу нічальніц
	прылады для ткацтва

Экспазіцыя "Гісторыя роднага краю" расказвае аб майстрыхах, якія яшчэ ў 1984 годзе аднавілі працэс ткацтва ў нашай школе. Гэта іх рукамі ствараўся і сённяшні музей. Гэта вельмі таленавітыя, працавітыя, проста цудоўныя жанчыны.

	Качкан Тарэса Зянонаўна
	Аўсюкевіч Луцыя Рамуальдаўна
	Лось Камілія Браніславаўна